透過開放原始碼私隱技術保障表達自由，實現安全嘅全球通訊。
我哋嘅使命
透過開放原始碼私隱技術保障言論自由，實現安全嘅全球通訊。
以私隱為先
憑住我哋嘅旗艦產品 Signal Messenger，我哋深信捍衛用戶私隱唔只係「負責任地」管理你嘅資料咁簡單，而係代表你嘅資料唔會落入任何人手中 (包括我哋)。
開放原始碼
作為開放原始碼社群嘅忠實成員，我哋積極透過發布技術同分享知識，鼓勵其他公司喺產品同服務上採用呢項技術。
非牟利
Signal 基金會係屬於 501c3 嘅非營利組織。我哋為此感到驕傲，同時會努力證明非營利組織都可以好似商業機構咁樣創新同擴展。
基金會 + 有限公司
Signal 基金會喺 2018 年成立，旨在為 2012 年創立嘅 Signal Messenger 提供支持。有賴基金會嘅支持，Signal 得以持續營運同發展，並且開發私密通訊嘅未來。
私隱勝於利潤
Signal 係一間非牟利機構，背後冇任何廣告商或投資者，全靠用戶同支持者推動。
點解要用「基金會」+「有限法律責任公司」(LLC) 嘅結構？
我哋成立 Signal 基金會作為 Signal Messenger 嘅母公司，皆因我哋希望有朝一日可以推廣埋其他私隱保護嘅項目，實現同一使命。
任何人都可以免費使用
我哋依賴社群嘅支持，向全球數以百萬計嘅用戶提供 Signal Messenger 免費應用程式。你會唔會支持呢項志業？
董事會成員
Amba Kak
安巴·卡克 (Amba Kak) 係一位律師兼技術政策專家，擁有超過 10 年嘅跨國經驗，專門為政府監管機構、各行各業、民間社會組織同慈善團體提供專業諮詢服務。佢目前擔任紐約頂尖政策研究組織 AI Now Institute 嘅執行董事，以及美國東北大學網絡安全與私隱研究所 (Cybersecurity and Privacy Institute) 嘅高級研究員。
安巴曾經任職美國聯邦貿易委員會嘅高級顧問，就當前技術問題向監管機構提供建議。喺加入 AI Now 之前，佢曾經係 Mozilla 嘅全球政策顧問，負責就資料私隱法同網絡中立等問題，策劃同改善組織喺亞太區同其他地區嘅定位。佢目前擔任 Mozilla 基金會嘅董事會計畫委員會成員。安巴持有印度國立法學大學嘅法學學士 (榮譽) 學位，仲以羅德獎學金 (Rhodes Scholar) 持有人身分，完成咗牛津大學法律碩士 (BCL) 同互聯網社會科學碩士學位。
Brian Acton
布萊恩·阿克頓 (Brian Acton) 係一位企業家兼電腦程式設計師，喺 2009 年共同創立通訊應用程式 WhatsApp。應用程式喺 2014 年賣咗俾 Facebook 之後，阿克頓因為同公司喺使用客戶數據同定向廣告方面意見唔同，於是決定離開公司，將精力集中喺非牟利事業上。2018 年 2 月，阿克頓自資五千萬美元，同馬克西·馬林斯派克 (Moxie Marlinspike) 一齊創立咗 Signal 基金會。Signal 基金會係一個非牟利組織，致力做好基礎工作，令更多人可以享用安全、普及嘅私人通訊服務。
喺創立 WhatsApp 同 Signal 基金會之前，阿克頓喺 Apple、Yahoo 同 Adobe 等公司擔任過軟件製造人員超過 25 年。
Jay Sullivan
傑伊係一位資深產品製作人員，喺消費技術產品同工程方面擁有豐富領導經驗。佢曾經擔任 Twitter 嘅消費者與收益產品總經理，帶領團隊進行工程、產品、設計、研究同資料科學方面嘅項目。喺加入 Twitter 之前，傑伊曾經喺 Facebook 工作，帶領團隊開發 Reality Labs 嘅人工智能助理，之後亦領導私隱、誠信與系統產品團隊負責 Messenger 同 Instagram Direct 嘅工作。傑伊曾經擔任 Mozilla 嘅產品高級副總裁兼營運總監，帶領團隊推出多個 Firefox 嘅主要發行版本，亦積極宣傳呢個網路平台，為網絡使用者提供更多選擇同控制權。
佢亦係一位初創公司嘅創辦人，喺職業生涯嘅初期，曾經擔任 Firefly Network (已被微軟收購) 同 Oracle 嘅軟件工程師同工程經理。
傑伊持有耶魯大學嘅應用數學學士學位，而且係多項美國專利嘅共同發明人。
Katherine Maher
嘉芙蓮·馬赫係維基媒體基金會嘅前行政總裁兼執行董事，負責管理維基百科。佢目前擔任大西洋理事會嘅非常任高級研究員，主要負責處理技術、人權同民主等議題。喺加入維基媒體之前，佢曾經擔任數碼權利組織 Access Now 嘅倡導董事。馬赫亦都係外交關係委員會嘅任期成員、世界經濟論壇全球青年領袖同杜魯門國家安全項目嘅安全研究員，仲係科技與民主中心、消費者報告、美國數碼公共圖書館、Adventure Scientists 同 System.com 嘅董事會成員，以及貝魯特美國大學嘅受託人。佢目前擔任美國國務院外交政策委員會嘅委任成員，負責就技術政策向國務卿提供建議。馬赫先後喺埃及開羅嘅美國大學阿拉伯語言學院，同埋敘利亞大馬士革嘅法國阿拉伯研究學院 (L'IFEAD) 讀書，之後喺 2005 年攞到紐約大學藝術與科學學院嘅中東與伊斯蘭研究學士學位。
Meredith Whittaker
梅瑞迪思·惠特克 (Meredith Whittaker) 係 Signal 嘅總裁，亦係 Signal 基金會嘅董事會成員。
佢喺科技行業擁有超過 17 年經驗，橫跨工業、學術同政府界別。加入 Signal 擔任總裁之前，佢係紐約大學嘅 Minderoo 研究教授，仲喺佢共同創立嘅 AI 現代研究所 (AI Now Institute) 擔任學系主任。佢嘅研究同學術工作幫助制定全球嘅人工智能政策，並且改變咗公眾對人工智能嘅表述，進一步認識到現代人工智能所需嘅監控業務實踐同工業資源嘅集中度。加入紐約大學之前，佢喺 Google 工作咗超過十年，負責領導產品同工程團隊，創立咗 Google 開放研究小組，並且共同創立咗分布全球嘅網絡測量平台 M-Lab，目前提供世界上最大嘅互聯網性能開放數據來源。另外，佢亦有協助領導 Google 嘅組織工作。佢係其中一位反對公司對人工智能同相關危害嘅疑慮反應不足嘅核心召集人，亦係 Google 罷工行動嘅主要策劃人。佢曾經為白宮、聯邦通訊委員會、紐約市、歐洲議會同好多其他政府同民間社區組織提供有關私隱、安全、人工智能、互聯網政策同測量方面嘅建議。佢最近完成咗作為美國聯邦貿易委員會主席嘅高級人工智能顧問嘅任期。
榮譽成員
Moxie Marlinspike
馬克西·馬林斯派克 (Moxie MarlinSpike) 係 Signal 嘅創辦人。